Саха сирин норуоттарын VIII-с спортивнай Оонньуулара үйэ чиэппэрин уҥуордаан Бороҕоҥҥо иккистээн ыытыллаллар

Бүтүн өрөспүүбүлүкэбит олоҕор-дьаһаҕар, сайдыытыгар сүдү суолталаах, эппиэтинэстээх күммүт тосхойдо. Быйыл Саха АССР төрүттэммитэ 100 сылын бэлиэтиирбит итиэннэ Саха сирин норуоттарын VIII-с спортивнай оонньуулара улууспутугар 26 сыл быысаһан эргийэн кэлбиттэрэ өссө үрдүк эппиэтинэһи сүктэрэр.

Ол ааспыт 1996 сыл өрөспүүбүлүкэбит, улууспут успуордун устуоруйатыгар бастакы уопуту, бастакы суолу-ииһи хаалларбыт умнуллубат түгэн. Онтон суол тэлиллэн, күн бүгүн иккис оонньууларбыт эмиэ биһиги сирбитигэр-уоппутугар ыытыллаллара – киэн туттуубут.

СӨ бырабыыталыстыбатын 1995 сыл балаҕан ыйын 18 күнүнээҕи 1066 №-дээх уурааҕынан, Саха сирин норуоттарын бастакы спортивнай оонньууларын 1996 cылга Уус Алдан оройуонун киинигэр Бороҕоҥҥо ыытарга быһаарыллыбыта. Улуус дьаһалтатын сүбэтин алтынньы 6 күнүнээҕи уурааҕынан 13 киһиттэн састааптаах, улуус баһылыга А.В. Мигалкин бэрэссэдээтэллээх тэрийэр хамыыһыйа, ону таһынан 12 үлэ араас хамыыһыйалара тэриллибиттэрэ.

Саха сирин норуоттарын бастакы спортивнай оонньууларын финала 1996 сыл бэс ыйын 26-29 күннэригэр Бороҕоҥҥо үрдүк таһымнаахтык ыытыллыбыттара. Бу Оонньуулар Олимпийскай оонньуулар төрүттэммиттэрэ 100 сылын туолуутугар анаммыттара. Ол иһин норуокка “Саха сирин олимпиадата” диэн ааттаммыта. Уопсайа 23 улуустан, Дьокуускай куораттан, СГУ-тан, ДьГТХА-тан 900-тэн тахса спортсмен күөн көрсүбүттэрэ, илин-кэлин түһүспүттэрэ. Күрэхтэһии бырагырааматыгар 13 успуорт көрүҥнэрэ киирбиттэрэ.

Оонньуулары үөрүүлээхтик аһыыга Чурапчыттан аҕалыллыбыт уоту биһиги биллиилээх бөҕөстөрбүт Василий Гоголев уонна Владимир Торговкин стадиоҥҥа тутан киллэрбиттэрэ. Оттон Оонньуулар уоттарын уматар үрдүк чиэс норуоттар икки ардыларынааҕы кылаастаах успуорт маастарыгар Афанасий Заболоцкайга сүктэриллибитэ.

Уопсай түмүккэ киин улуустар икки ардыларыгар кыайыылааҕынан Дьокуускай куорат хамаандата, иккис – Мэҥэ Хаҥалас улууһа, үһүс – СГУ ааттаммыттара. Хотугу улуустарга Эдьигээн, Үөһээ Дьааҥы, Орто Халыма улуустара бастыҥнарынан буолбуттара.